Aks

kal phir apne aks se pehchaan hui
rasm aur riwaazo se bechain,
kuch armmano ki kafan oodhe,
apne hi kuch khwaabo.n ki
mayyat mein jaa raha tha..

bandha sa tha sehra ke jarre jarre mein
bikhra sa tha door-talak
naa koi aagaaz tha,
aur na hi koi anjaam
kadi dhoop seene ki marham thi,
aur machalti hawa uske dil ke badepan ko
tukdo ki maanind samet liye udi thi..

tha thoda sa naata
unn katili jhaadiyo.n se
jo palti thi uss pe,
jo thamti thi uss pe,
ithlaati thi uske paiband
daaman pe,
aur phir bhi,
uski rawangi,uski diwangi pe
khilkhila ke hasna unka,silsilewaar tha..

waqt uska sautela tha,
wo chalta gaya,
wo bikharta gaya,
doobte suraj ki parchai
lambi hoti chali gayi,
aur uska khud ka paimaana khud se
hi bharta chala gaya..

kal phir apne aks se pehchaan hui,
aaj phir apne banjarpan ka ehsaas hua
kal phir baarish ki doo boondo.n ne gudgudi ki,
aaj phir meri akeli shakshiyat ,
apne aks aur uski aawargi ki mohtaaz hai..